Helschestäenor Woigedichd

"Driebes Wedder "

Wennd Sunn verschwind uns iss net schee,
dann trink de Woi aus Helschestäe.

Gewachse in de Klenä Hohl
schmeckt der so gut und dud dir wohl.

Gieß oi vun dem guden Drobbe,
am beschde voll, en ganze Schoppe.

Wanns dann de Gorschl nunner rinnt,
werds dabber besser, ganz beschdimmt.

Nur denk dro, uff äm Bää,
kons stärkste Hinkel net lang stee.

Im Keller drunne is noch Woi
den holschdo ruff un schengstn ei.

Doch pass of deine Schlabbe uff,
dast net fallscht, die Drebbe nuff.

Net dast vom Helschstäener Woi
noch was verdrobst, ins Zimmer noi.

Es beschde is beim dridde Schoppe
du hockst dich uff de Kellerbodde.

Am Reiwerle direkt vorm Fass
da macht de Woi so richtig Spaß.

Uff ämool wird dirs immer heller
im feuchde, alde Woifasskeller.

Swerd warm, gemiedlich, bass obacht un
schunn gehtse uff, de Kellersunn.

Dann ises wieder richdich schee,
bei uns dahääm in Hälschestäe.